Saida mak Maromak nia hakarak ba mundu ne’e?

 MAROMAK nia hakarak ba mundu ne’e kapás tebetebes. Maromak Jeová hakarak mundu ne’e atu nakonu ho ema ne’ebé kontente no isin-di’ak. Bíblia hatete katak Maromak “halo jardín iha Eden”, no nia “hamoris…ai-hun oioin ne’ebé di’ak atu haree no di’ak atu han”. Depois Maromak kria mane no feto primeiru, Adão ho Eva, Nia fó sira hela iha fatin kapás no hatete ba sira: “Iha oan no bei-oan bá no sai barak, no halo mundu nakonu, no haburas mundu tomak.” (Gênesis 1:28; 2:8, 9, 15) Nune’e Maromak hakarak katak ema iha oan sira, haluan jardín to’o mundu tomak sai paraízu, no tau matan ba animál hotu.

² Tuir Ita-nia hanoin, Maromak Jeová nia hakarak ba ema hotu atu moris iha mundu paraízu sei sai loos ka lae? Maromak hatete: “Ha’u rasik ko’alia ona…Ha’u sei halo nune’e.” (Isaías 46:9-11; 55:11) Sin, buat ne’ebé Maromak hakarak halo, nia sei halo duni! Nia hatete katak nia “la kria [mundu] ho saugati de’it”, maibé “halo mundu hodi ema hela iha mundu ne’e”. (Isaías 45:18) Maromak hakarak ema hanesan saida atu moris iha mundu? Maromak hakarak ema atu moris iha mundu to’o tinan hira? Bíblia hatán: “Ema ne’ebé loos rasik sei simu rai, no sira sei moris ba nafatin iha ne’ebá.” — Salmo 37:29; Apokalipse 21:3, 4.

³Klaru katak ida-ne’e seidauk akontese, tanba agora ema sai moras no mate; sira mós funu no oho malu. Maibé, Maromak la hakarak katak mundu sai aat hanesan agora! Nune’e, tanbasá mak problema sira mosu? Tanbasá mak Maromak nia hakarak la sai loos? Ita la bele hetan resposta iha livru istória ne’ebé ema hakerek, tanba problema nia hun mosu iha lalehan.